પ્રેગ્નેન્સીમાં પેટમાં દુખાવો રહેતો હોય તો ગભરાયા વિના આટલું કરો, આરામ મળશે

જો તમે હાલમાં જ પ્રેગ્નેન્ટ થયા હો તો સંભવ છે કે તમને ખુશીની સાથે સાથે નાની-નાની વાતે ચિંતા પણ થતી હશે. એમાં પણ પહેલીવાર પ્રેગ્નેન્ટ થતી મહિલાઓ સાથે તો આવું વધારે થતું હશે. પ્રેગ્નેન્સીમાં ઊલટી થવી, ચક્કર આવવા, શરીરમાં દુખાવો થવો, કંઈ ખાવાપીવાની ઈચ્છા ના થવી વગેરે જેવા લક્ષણ દેખાય તો એવો વિચાર ઝબકતો હશે કે શું આ નોર્મલ છે? શું આ બધાની સાથે થતું હશે? ક્યાંય મારા બાળકને કોઈ મુશ્કેલી તો નહીં હોય ને? આ સવાલોની સાથે સૌથી વધુ ડર ત્યારે લાગે છે જ્યારે પ્રેગ્નેન્સી વખતે પેટમાં દુખાવો થાય. અહીં તમને જણાવીશું કે પ્રેગ્નેન્સીમાં ક્યારે દુખાવો થવો સામાન્ય ગણાય અને ક્યારે ડૉક્ટરની સલાહ લેવી જોઈએ.

હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો

પેટનો સામાન્ય દુખાવો

પ્રેગ્નેન્સીની શરૂઆતના ત્રણ મહિનામાં એટલે કે 1થી 12 અઠવાડિયા દરમિયાન પેટમાં સામાન્ય દુખાવો થતો રહે છે. કારણકે આ દરમિયાન તમારા શરીરમાં ઘણા ફેરફાર આવતા હોય છે. તમારું ગર્ભાશય પહોળું થાય છે, લિગમેન્ટ્સ ખેંચાવા લાગે છે, મોર્નિંગ સિકનેસ રહે છે. આ બધાને કારણે પેટમાં દુખાવો થવો સામાન્ય છે.

ગર્ભાશયનો આકાર મોટો થાય છે

પ્રેગ્નેન્સી દરમિયાન ગર્ભાશયનો આકાર મોટો થતો જાય છે તેમ તેમ પેટના અન્ય અંગોની જગ્યા ખસે છે. જેના કારણે જમ્યા વિના જ પેટ ભરેલું હોય તેવું લાગે છે અથવા તો પેટમાં સામાન્ય દુખાવો થાય છે. આ કારણે દુખાવો થવો સામાન્ય બાબત છે.

કબજિયાત અને ગેસની તકલીફ

ઘણીવાર પ્રેગ્નેન્ટ મહિલાને કબજિયાત અને ગેસની તકલીફ થાય છે. આ જ કારણે પ્રેગ્નેન્સી દરમિયાન પ્રોજેસ્ટેરોન નામના હોર્મોનનું સ્તર વધવા લાગે છે. જેના કારણે આંતરડા સુધી ખોરાક પહોંચવાની પ્રક્રિયા મંદ થઈ જાય છે. આ કારણે પેટમાં ગેસ બને છે અને ઘણીવાર કબજિયાત થઈ જાય છે.

ક્યારે જવું જોઈએ ડૉક્ટર પાસે?

જો તમને પ્રેગ્નેન્સીના શરૂઆતના દિવસોમાં પીરિયડ્સમાં થતાં દુખાવા જેવો અનુભવ થાય અથવા ક્રેમ્પ્સ આવે અને પોઝિશન બદલવાથી દુખાવો બંધ થઈ જાય તો પરેશાન થવાની જરૂર નથી. પરંતુ પેટમાં ખૂબ જ દુખાવો થાય અને સાથે બ્લિડિંગ પણ થાય અથવા તો પેટના દુખાવા સાથે ઊલટી થાય તો કોઈપણ રિસ્ક લીધા વિના ડૉક્ટર પાસે દોડી જવું જોઈએ.

પેટના દુખાવા માટે કરો આ ઉપાયો

થોડું-થોડું જમો

જો તમને ભૂખ લાગી હોય તો એકવારમાં જ ઘણું બધું ના ખાવ. થોડી થોડીવારે ખાવું જોઈએ. પેટ હળવું રહેશે તો પેટમાં ઓછો દુખાવો થશે.

કસરત કરો

આખા દિવસ દરમિયાન અડધો કલાક કસરત કરવાથી પેટનો દુખાવો થતો નથી. જો કે, આનો અર્થ એ નથી કે તમે ભારે વજન ઉઠાવો. સંતુલિત અને હળવી કસરત કરવી જેથી શરીર એક્ટિવ રહે.

ફાઈબરવાળી વસ્તુઓ ખાવ

એવી ચીજવસ્તુઓ ખાવાનું રાખો જેમાં ફાઈબરનું પ્રમાણ વધારે હોય. આ સિવાય લીલા શાકભાજી, ફળ વગેરેનું સેવન કરવું જોઈએ. આનાથી પેટ સાફ રહેશે અને કબજિયાત-ગેસની સમસ્યા નહીં થાય.

આરામ કરો

જો પેટમાં દુખાવો થતો હોય તો આરામ કરવો. શરીરને વધારે સ્ટ્રેસ આપવાની જરૂર નથી.

Disclaimer: આ આર્ટિકલમાં આપવામાં આવેલી માહિતીનો અમલ કરતા પહેલા આપના ડૉક્ટરની સલાહ ચોક્કસ લેશો.

હોમ પ્રેગ્નેન્સી ટેસ્ટ સાથે જોડાયેલ આ વાતો જાણવી તમારે ખૂબ જરુરી

source https://www.iamgujarat.com/health-news/stomach-ache-during-pregnancy-is-common-this-remedies-may-helpful-526615/