આ ત્રણ સૂપ પીવાથી સરળતાથી ઓછી થઈ જશે પેટ પરની ચરબી, જાણો બનાવવાની રીત

ઘરે જે સૂપ બનાવવામાં આવે છે તે પોષક તત્વો સિવાય કાર્બ્સથી ભરપૂર હોય છે. જ્યારે રેસ્ટોરાંમાં મળતા સૂપમાં આર્ટિફિશિયલ સેસેન્સ અને ફ્રોઝન શાકભાજી હોય છે, તેમાં કોર્ન સ્ટાર્ચ પણ હોય છે. જેથી તે માત્ર ટેસ્ટમાં જ સારૂં લાગે છે. સ્વાસ્થ્ય માટે ફાયદાકારક હોતું નથી. સાથે જ તે પીવાથી વજન પણ વધે છે. એટલે જો તમારે વજન ઘટાડવું હોય તો ઘરે જ સૂપ બનાવો. ત્રણ સૂપ એવા છે જે સરળતાથી ઘર પર તાજા શાકભાજીથી બનાવીને વજન ઘટાડી શકો છો.

હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો:

સૂપ માટે આ શાકભાજીનો કરો ઉપયોગઃ
સૂપ બનાવવા માટે તેવા શાકભાજીનો ઉપયોગ કરો જેમાં ફાઈબર વધારે હોય. જેમ કે, બ્રોકોલી, ગાજર, ટામેટા. કારણ કે તેમાં વિટામિન અને ખનિજ તત્વો વધારે હોય છે. ગાજરમાં કેલેરી ઓછી હોય છે તો ટામેટાં વિટામિન સીથી ભરપૂર હોય છે અને બ્રોકોલીમાં ફાઈટોકેમિકલ્સ હોય છે, જે વેટ લોસમાં મદદ કરે છે.

બ્રોકોલી-ગાજર સૂપ
આ સૂપમાંથી કેલેરી ઓછી મળશે પરંતુ વિટામિન તેમજ મિનરલ્સ વધારે મળશે. આ સૂપ પીધા બાદ પેટ લાંબા સમય સુધી ભરેલું લાગશે. જેનાથી વજન અને શુગર કંટ્રોલમાં રહેશે.

સામગ્રીઃ
1 કપ સમારેલી બ્રોકોલી, 1 કપ સમારેલા ગાજર, 1 કપ લીલા વટાણા, 1 કપ સમારેલા કેપ્સિકમ મરચાં, 1 નંગ સમારેલી ડુંગળી, 6 નંગ લસણની કળી, 6 મરીના દાણા અને સ્વાદાનુંસાર મીઠું

બનાવવાની રીતઃ
પેનમાં એક ચમચી તેલ લઈને ગરમ થવા દો. તેલ ગરમ થાય એટલે તેમાં લસણ અને ડુંગળીને ગોલ્ડન બ્રાઉન કલરની શેકી લો. હવે બાકીના બધા શાકભાજીને તેમાં ઉમેરીને પાંચ મિનિટ સુધી શેકો. હવે તેમાં જરૂર મુજબ પાણી ઉમેરીને મિશ્રણને ઉકળવા દો. પેનનું ઢાંકણ ઢાંકીને 10 મિનિટ સુધી મીડિયમ ફ્લેમ પર ચડવા દો. ઉપરથી સ્વાદાનુંસાર મીઠું અને કાળા મરી ઉમેરો. તો તૈયાર છે બ્રોકોલી-ગાજર સૂપ. તેને ગરમાગરમ સર્વ કરો.

મશરૂમ સૂપઃ
મશરૂમ સ્વાદિષ્ટ હોવાની સાથે સ્વાસ્થ્યથી ભરપૂર હોય છે. તે ગ્લૂકોઝને કંટ્રોલમાં રાખે છે અને ચરબીને ઓગાળે છે. મશરૂમ પ્રોટીનથી ભરપૂર હોય છે અને તેનાથી મેટાબોલિઝ્મ વધે છે. જેનાથી વજન ઝડપથી ઘટે છે.

સામગ્રીઃ
1 ચમચી તેલ, 1 કપ સમારેલા મશરૂમ, 1/2 કપ મકાઈના દાણા બાફેલા, 1 નંગ સમારેલી ડુંગળી. 3 નંગ લસણની કળી, સ્વાદાનુંસાર મીઠું, 1 કપ દૂધ, સ્વાદાનુંસાર મરી પાઉડર અને 2 કપ પાણી.

બનાવવાની રીતઃ
પેનમાં તેલ લઈને મશરૂમને તેમાં શેકી લો. બાદમાં તેમાં મકાઈના બાફેલા દાણા અને દૂધ ઉમેરો. હવે ગેસ બંધ કરી આ મિશ્રણને ઠંડુ થવા દો. મિશ્રણ ઠંડુ થઈ જાય એટલે તેને મિક્સર જારમાં કરકરૂં ક્રશ કરી લો. પેનમાં થોડું તેલ લઈ તેમાં ડુંગળી અને લસણને શેકી લો અને તૈયાર કરેલું મિશ્રણ તેમાં મિક્સ કરો. 3 મિનિટ સુધી તેને ઉકાળો. ઉકળી જાય એટલે ગરમાગરમ સર્વ કરો.

ફૂલકોબીનું સૂપઃ
ફૂલકોબી સૌથી વધારે પૌષ્ટિક અને સરળતાથી મળી રહેતી શાકભાજીમાં એક છે. 100 ગ્રામ ફૂલકોબીમાં માત્ર 25 કેલેરી હોય છે. વજન ઓછું કરવાનો પ્રયાસ કરી રહેલા લોકો માટે આ બેસ્ટ સૂપ છે. જે ભૂખને પણ કંટ્રોલમાં રાખે છે.

સામગ્રી
1 કપ સમારેલી ફૂલકોબી, 1 નંગ સમારેલી ડુંગળી, 2 નાના બટાકા સમારેલા, 1 ચમચી ઓલિવ ઓઈલ, 5 નંગ લસણની કળી, ક્રીમ અને વેજિટેબલ સ્ટોક

બનાવવાની રીતઃ
એક પેનમાં તેલ લો, તે ગરમ થઈ જાય એટલે લસણ અને ડુંગળીને શેકી લો. તેમાં બટાકા, ફૂલકોબી અને વેજિટેબલ સ્ટોક ઉમેરીને ગરમ થવા દો. સૂપ થોડું ઘટ્ટ થઈ જાય એટલે ગેસ બંધ કરીને ગરમાગરમ સર્વ કરો. તમે ઈચ્છો તો સૂપમાં મુસલી પણ એડ કરી શકો છો.

આ ત્રણ સૂપને તમારા ડાયેટમાં સામેલ કરો. રાત્રિના સમયે જ સૂપ પીવું જેથી વધારે પડતી કેલેરી લેવાથી બચી શકો.

સ્ટેમિના વધારવા માટે દવાનું કામ કરશે આ ફૂડ, ડાયેટમાં સામેલ કરો 

source https://www.iamgujarat.com/health-news/these-three-soup-will-help-you-in-weight-loss-know-how-to-make-517091/