ACમાં રહેવાથી વધે છે કોરોના વાયરસના સંક્રમણનો ખતરો? ડૉક્ટરે જણાવી હકીકત

દેશમાં સંપૂર્ણ લોકડાઉન હોવા છતાં કોરોના વાયરસના કેસમાં વધારો જોવા મળી રહ્યો છે. ભારતમાં કોરોના સંક્રમિતોનો આંકડો 11 હજારને પાર થયો છે જ્યારે 377 લોકો જીવ ગુમાવી ચૂક્યા છે. દેશમાં 3 મે સુધી લોકડાઉન લંબાવવામાં આવ્યું છે. કોરોના સામે રક્ષણ મેળવવા ઘરમાં રહેવા ઉપરાંત પણ લોકો ઘણા ઉપાયો અજમાવી રહ્યા છે. કોરોનાના સંકટ વચ્ચે લોકોના મનમાં ઘણા સવાલો પેદા થઈ રહ્યા છે. જેના જવાબ એમ્સના ડાયરેક્ટરે આપ્યા છે.

હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો

ખાનગી મીડિયા ચેનલ સાથેની વાતચીતમાં દિલ્હી સ્થિત એમ્સના ડાયરેક્ટર રણદીપ ગુલેરિયાએ લોકોને મૂંઝવતા પ્રશ્નોના જવાબ આપ્યા છે. ગરમી શરૂ થઈ ગઈ છે ત્યારે લોકોને એ સવાલ મૂંઝવી રહ્યો છે કે કાર અથવા ઘરમાં AC ચલાવવાથી કોરોનાના સંક્રમણનું જોખમ વધે છે?

ડૉ. રણદીપ ગુલેરિયાએ જણાવ્યું, ‘AC ચલાવવા સામે જોખમ ત્યારે ઊભું થાય જ્યારે ક્રોસ વેન્ટિલેશન થતું હોય. જો તમારા ઘરમાં વિન્ડો એસી હોય તો હવા માત્ર તમારા રૂમ પૂરતી જ સીમિત રહેશે. એટલે જ વિન્ડો એસી કાર કે રૂમમાં ચલાવવાથી કોઈ સમસ્યા થતી નથી. પરંતુ સેન્ટ્રલ એસીથી સંક્રમણ થવાનો ખતરો રહે છે.’

ડૉ. ગુલેરિયાએ આગળ જણાવ્યું, “સેન્ટ્રલ એસીની હવા દરેક રૂમમાં જાય છે અને બીજા રૂમમાં કે ઓફિસના કોઈ ભાગમાં કોઈ સંક્રમિત વ્યક્તિ ઉધરસ ખાય તો એસીની હવા દ્વારા ઈન્ફેક્શન એક રૂમમાંથી બીજા રૂમમાં ફેલાઈ શકે છે. જો વિન્ડો એસી કોઈ એક જ રૂમમાં લાગ્યું હોય તો તેને ચલાવવામાં વાંધો નથી.”

સેન્ટ્રલ એસીથી સંક્રમણ ફેલવાનો ખતરો હોઈ શકે છે. ડૉક્ટરે જણાવ્યું કે, ઘણી હોસ્પિટલોમાં જ્યાં કોરોનાના દર્દીઓની સારવાર ચાલતી હોય ત્યાં સેન્ટ્રલ એસી કાઢીને વિન્ડો એસી લગાવવામાં આવી રહ્યા છે. જેમ-જેમ ગરમી વધશે તેમ-તેમ ડૉક્ટરો માટે કોરોનાના દર્દીઓની સારવાર કરવી મુશ્કેલ બનશે. કોરોનાના દર્દીઓની સારવાર કરતા ડૉક્ટરો અને અન્ય મેડિકલ સ્ટાફ પીપીઈ કિટ પહેરે છે. ગરમીમાં આ સૂટ પહેરીને એસી વિના દર્દીઓની સારવાર કરવી મુશ્કેલ સાબિત થઈ શકે છે. એટલે જ વિન્ડો એસી લગાવવું જરૂરી બને છે.

સૌથી વધુ કેસ ધરાવતા કેરળે કઈ રીતે ખતરનાક કોરોના પર કાબૂ મેળવી લીધો?

source https://www.iamgujarat.com/health-news/can-ac-usage-cause-coronavirus-spread-544077/