નોબેલ વિજેતાએ કહ્યું, આગામી 9-12 મહિના કોરોનાની રસીની વાત જ ભૂલી જજો

મેલબોર્ન: નોબેલ પારિતોષિક વિજેતા પીટર ચાર્લ્સ ડોહર્ટીએ કોરોના સામેની લડાઈ સરકારો માટે આવનારા દિવસોમાં ખૂબ જ અઘરી બની રહેશે તેમ જણાવ્યું છે. ઓસ્ટ્રેલિયાના ઈમ્યુનોલોજિસ્ટ પીટરના જણાવ્યા અનુસાર, ભારત જેવા ગીચ વસ્તી ધરાવતા દેશમાં લોકડાઉનમાં છૂટછાટ ચિંતાજનક છે. જોકે, સંપૂર્ણ લોકડાઉન સામાજીક અને આર્થિક રીતે અશક્ય હોવાનું પણ તેમનું માનવું છે.

આગામી દિવસોમાં કોરોનાના કેસો વધશે તેવી ચેતવણી આપતા પીટર ચાર્લ્સે કહ્યું છે કે આગામી 9-12 મહિના સુધી તેની સામે રક્ષણ આપે તેવી રસી શોધાવાની પણ શક્યતા નથી. તેમનું માનવું છે કે, જો તમામ પરિક્ષણો યોગ્ય રીતે પાર પડે તો પણ કોઈ રસી સુરક્ષિત અને અસરકાર છે તે જાણવામાં જ સપ્ટેમ્બર કે ઓક્ટોબર આવી જશે. ત્યારબાદ રસીનું ઉત્પાદન, કેટલી ઝડપથી તે બની શકે અને લોકોને અપાઈ શકાય તે પાછી અલગ અને લાંબી પ્રક્રિયા છે.

કોરોના વાયરસ ઈન્ફ્લુએન્ઝાની જેમ ઝડપથી પોતાનું સ્વરુપ નથી બદલતો. જેથી એક જ રસી આખી દુનિયાના લોકો પર અસર કરવી જોઈએ. યુનિ. ઓફ મેલબોર્નના ડીપાર્ટમેન્ટ ઓફ માઈક્રોબાયોલોજી એન્ડ ઈમ્યુનોલોજી સાથે સંકળાયેલા પીટર ચાર્લ્સ 1996માં નોબેલ જીત્યા હતા. શરીરની રોગપ્રતિકાર શક્તિ કઈ રીતે વાયરસગ્રસ્ત કોષને સામાન્ય કોષથી અલગ તારવી તેમને ઠીક કરી શકે છે તેના પર સંશોધન બદલ તેમને નોબેલ મળ્યું હતું.

લોકડાઉન અંગે પોતાનો મત વ્યક્ત કરતા તેમણે જણાવ્યું હતું કે જો તે માત્ર સાયન્સનો જ મુદ્દો હોત તો દરેક જગ્યાએ તેનો અમલ થવો જોઈતો હતો, પરંતુ લોકડાઉન સામાજીક અને આર્થિક રીતે લાંબો સમય ખેંચવું અશક્ય છે. કોરોનાનો ચેપ કઈ રીતે અટકાવી શકાય તે અંગે તેમણે જણાવ્યું હતું કે લોકો જવાબદારીથી વર્તે અને રેપિડ રિસ્પોન્સ તેમજ કોન્ટેક્ટ ટેસ્ટિંગ વધારાય તો આ વાયરસનો ફેલાવો નિયંત્રણમાં લઈ શકાય.

કોરોનાને કાબૂમાં લેવા હાલની સ્થિતિમાં લોકડાઉન સિવાય બીજો કોઈ ઓપ્શન છે કે તેમ તે સવાલનો જવાબ આપતા તેમણે જણાવ્યું હતું કે સરહદો બંધ કર્યા સિવાય કોઈ વિકલ્પ નથી. દક્ષિણ કોરિયાનું ઉદા. આપતા તેમણે કહ્યું હતું કે ખૂબ જ મોટા સ્તરે ટેસ્ટ અને કોન્ટેક્ટ ટ્રેસિંગ જ વેક્સિન ના શોધાય ત્યાં સુધી કોરોનાને અટકાવવાના સૌતી સારા વિકલ્પ છે.

source https://www.iamgujarat.com/health-news/nobel-laureate-concerned-about-lockdown-relaxations-says-covid-vaccine-not-for-9-12-months-558468/