ગર્ભવતી મહિલા અને બાળકને તાવ જેવા લક્ષણોથી કઈ રીતે બચાવશો? જાણો, ડોક્ટરનો મત

પ્રેગનેન્સી દરેક કપલના જીવનનો સૌથી આનંદભર્યો સમય હોય છે. જોકે, આવા સમય દરમિયાન બાળકને કઈ રીતે સુરક્ષિત રાખવું, તેમજ ડોક્ટરની અપોઈન્ટમેન્ટ લેવાથી લઈને મેડિકલ ટેસ્ટ કરાવવાના કામ ખૂબ જ અઘરા બની ગયા છે. પોતાના તેમજ બાળકના સ્વાસ્થ્યની જાળવણી માટે ઘણી બાબતો ગર્ભવતી સ્ત્રીઓ ધ્યાનમાં રાખતી હોય છે.

હેલ્ધી જમવાનું હોય કે વર્કઆઉટ, મેડિટેશન ક્લાસ હોય કે પર્ફેક્ટ મધર બનવાની ટિપ્સ આપતા પુસ્તકો. પ્રેગનેન્સીને યાદગાર બનાવવા અને બાળકનો ખ્યાલ રાખવામાં મહિલાઓ કોઈ કસર નથી છોડતી. આ બધા સિવાય બીજી એક સૌથી મહત્વની વસ્તુ છે વેક્સિનેશન. પ્રેગનેન્સીમાં જ નહીં, પ્રેગનેન્સી બાદ પણ અને નવજાત બાળક માટે વેક્સિનેશન ખૂબ જ મહત્વનું છે. તેનું એક લાંબુ લિસ્ટ ડોક્ટર આપતા હોય છે, જેમાંથી જો એકપણ રસી ભૂલાઈ જાય તો તેની ગંભીર અસર થઈ શકે છે.

વેક્સિનેશન પ્રત્યે જાગૃકતાનો અભાવ

આપણા દેશમાં પ્રેગનેન્સી દરમિયાન મહિલાઓમાં વેક્સિનેશન પ્રત્યે ભાગ્યે જ કોઈ જાગૃતિ જોવા મળે છે. જેનું એક મહત્વનું કારણ તેની સરળતાથી ઉપલબ્ધતા ના હોવાનું પણ છે. આ ઉપરાંત, તેની જાણકારીનો અભાવ અને સેફ્ટી ડેટાની ગેરહાજરી પણ ગર્ભવતી મહિલાઓને વેક્સિનેશન માટે ખાસ ઉત્સાહિત નથી કરતા. આપને જાણીને નવાઈ લાગશે કે અમેરિકામાં દરેક પ્રેગનેન્ટ મહિલાને ઈન્ફ્લુએન્ઝાની વેક્સિન લેવી ફરજિયાત છે. પરંતુ ભારતમાં ભાગ્યે જ કોઈ ગર્ભવતી મહિલાને આ રસી અપાય છે.

પ્રેગનેન્સીમાં તાવ

ગર્ભવતી મહિલાઓને કોઈપણ રોગ થવાનો કે ચેપ લાગવાનો ચાન્સ ખૂબ જ વધારે હોય છે. આ ઉપરાંત સીઝનલ ફ્લુ પણ તેમને ઝડપથી આવી શકે છે. તેમાંય ગર્ભાવસ્થામાં મહિલામાં જે માનસિક ફેરફારો થાય છે તે પણ જોખમ વધારી દે છે. પ્રેગનેન્ટ મહિલાની રોગપ્રતિકારક શક્તિને માત્ર તેનું જ નહીં, પરંતુ બાળકનું પણ રક્ષણ કરવાનું હોય છે. બાળક છ મહિનાનું થઈ જાય ત્યાં સુધી તે માતાના દૂધમાંથી જ પોષણ મેળવે છે, અને તેનાથી જ તેની રોગપ્રતિકારક શક્તિ વધે છે.

ઈન્ફ્લુએન્ઝાનો ચેપ લાગવાના જોખમો

આ સમયમાં તાવ આવવાનું જોખમ ખૂબ જ વધી જાય છે. અનેક સંશોધનો સૂચવે છે કે પ્રેગનેન્સીમાં ઈન્ફ્લુએન્ઝા ઘાતક નીવડી શકે છે. તેના કારણે પ્રિમેચ્યોર ડિલિવરી થવાનું જોખમ પણ વધી જાય છે. આ ઉપરાંત, બાળકનું વજન ઓછું હોવાથી સિઝેરિયન ડિલિવરીની શક્યતા પણ વધી જાય છે.

2009-10માં H1N1 ઈન્ફ્લુએન્ઝા ફાટી નીકળ્યો હતો. જેના કારણે અનેક ગર્ભવતી મહિલાઓને હોસ્પિટલાઈઝ્ડ કરવી પડી હતી, અને કેટલીકને તો ICUમાં રહેવું પડ્યું હતું. તેમાં સામાન્ય મહિલા કરતા ગર્ભવતી મહિલાનો મૃત્યુઆંક પણ ઉંચો રહ્યો હતો. આ ઉપરાંત, ઈન્ફ્લુએન્ઝાનું જેટલું જોખમ 65 વર્ષથી વધુ વય ધરાવતા વડીલોને છે, તેટલું જ જોખમ છ મહિનાથી ઓછી ઉંમર ધરાવતા બાળકોને પણ છે.

રસી કઈ રીતે મદદ કરી શકે?

ઈન્ફ્લુએન્ઝાની રસી બાળક અને નવજાત બાળકને તેનાથી બચાવવાનું સૌથી કારગત સાધન છે. નવજાત બાળકની રોગપ્રતિકારક શક્તિ તેની માતા પર જ નિર્ભર હોય છે. 1960માં આ રસી ગર્ભવતી મહિલાઓને માટે રિકમેન્ડેડ કરાઈ હતી. તેના પર ઘણું રિસર્ચ પણ થયું છે અને આ વેક્સિન સેફ પણ છે. એડવાઈઝરી કમિટિ ઓન ઈમ્યુનાઈઝેશન પ્રેક્ટિસ (ACIP) અને WHO પ્રેગનેન્સીના દરેક સ્ટેજમાં મહિલાઓને ઈન્ફ્લુએન્ઝા વેક્સિન આપવાનું રિકમેન્ડ કરે છે.

ફેડરેશન ઓફ ઓબ્સેટ્રિક એન્ડ ગાયનેકોલોજિકલ સોસાયટી ઓફ ઈન્ડિયા (FOGSI) પણ પ્રેગનેન્સીમાં ઈન્ફ્લુએન્ઝાની રસી લેવાની ભલામણ કરે છે. એવું પણ ધ્યાને આવ્યું છે કે આ રસી લેનારી ગર્ભવતી મહિલાઓમાં પ્રિમેચ્યોર ડિલિવરીનું જોખમ ઘટે છે, તેમજ બાળકનું વજન ઓછું હોવાના ચાન્સમાં પણ ઘટાડો થાય છે.

આ જ કારણે મોટાભાગના એક્સપર્ટ્સ પ્રેગનેન્સીના શરુઆતના તબક્કામાં જ ઈન્ફ્લુએન્ઝાની રસી લેવાનો આગ્રહ કરે છે. આપણા દેશમાં તાવની સીઝન ભૌગોલિક સ્થિતિ પ્રમાણે અલગ-અલગ છે, જેથી તેના પર વિશેષ ધ્યાન ના આપતા એ જરુરી છે કે ગર્ભવતી મહિલાઓ પોતાના ડોક્ટરની સલાહ લે અને આ રસીની જાણકારી મેળવે. જો તમે હાલમાં જ માતા બન્યા હો અને તમે આ રસી ના લીધી હોય અત્યારે પણ તેનો શોટ લેવાથી તમે અને તમારું બાળક ફ્લુથી સુરક્ષિત રહી શકો છો. જો માતા રસી લેશે તો તેના એન્ટિબોડી દૂધ દ્વારા બાળક સુધી પણ પહોંચી જશે.

હેલ્ધી અને સેફ પ્રેગનેન્સી તેમજ બાળકનો સૌથી મોટો આધાર તમને સાચી સલાહ મળે તેના પર છે. તમે આ અંગે તમારા ડોક્ટર પાસેથી માહિતી મેળવી શકો છો.

આ આર્ટિકલમાં અપાયેલી ડૉ. અજય વાલિયા (એમ.ડી., ડીજીઓ) દ્વારા આપવામાં આવી છે. તેઓ આ ક્ષેત્રમાં 20 વર્ષથી વધુનો અનુભવ ધરાવે છે અને વડોદરા સ્થિત ઈશા હોસ્પિટલમાં IVF સ્પેશિયાલિસ્ટ તરીકે ફરજ બજાવે છે.

રેફરન્સ –
https://ift.tt/2Z9UCk3
https://ift.tt/2KiG1us
https://ift.tt/3czZTFj

ડિસ્ક્લેમર

આ આર્ટિકલમાં ડોક્ટર દ્વારા જે વિચારો રજૂ કરાયા છે તે તેમના પોતાના છે, અને તેની ચોકસાઈ અંગેની અમારી કોઈ જવાબદારી નથી. આ માહિતીને ડોક્ટરની સલાહ તરીકે ના ગણવી. વધુ જાણકારી માટે આપ આપના ડોક્ટરનો સંપર્ક કરી શકો છો.

આ આર્ટિકલને Abbott India’s Mothers against Influenza Initiative વતી ટાઈમ્સ ઈન્ટરનેટની સ્પોટલાઈટ ટીમ દ્વારા પ્રસિદ્ધ કરાયો છે.

source https://www.iamgujarat.com/health-news/how-to-protect-pregnant-women-and-the-newborns-from-flu-like-symptoms-doctors-opinion-553310/