કોરોના વાયરસ: કરિયાણું ખરીદવા જાઓ ત્યારે આ કારણથી ગ્લવ્સ પહેરવાનું ટાળવું

કોરોના વાયરસનો કહેર

આપણા દેશમાં કોરોના વાયરસના કેસ દિવસેને દિવસે વધી રહ્યા છે. જેનાથી બચવા માટે સરકાર પણ સુરક્ષાના પૂરતા ઉપાયો કરવાની અપીલ કરી રહી છે. જેમ કે, માસ્ક પહેરવું, સોશિયલ ડિસ્ટન્સિંગનું પાલન તેમજ કોઈ વસ્તુને અડ્યા બાદ કે બહારથી આવ્યા બાદ હાથ ધોવા અથવા સેનિટાઈઝ કરવા. આ સિવાય જ્યારે તમારે મેડિકલ સ્ટોર્સ કે પછી કરિયાણાની દુકાને જવાનું થાય તો સાવચેતી માટે શું કરવું તે પણ એક સવાલ છે. મોટાભાગના લોકો ગ્લવ્સ પહેરીને કરિયાણું ખરીદવા જાય છે. પરંતુ શું આ યોગ્ય છે?. આ સરળ સવાલનો જવાબ છે ના.

ગ્લવ્સ પહેરવા યોગ્ય છે?

માસ્ક અને ફેસ શીલ્ડ પહેરવું તેમજ વારંવાર હાથ ધોવા તે બરાબર છે. પરંતુ ગ્લવ્સ પહેરવાથી ઈન્ફેક્શનનો ખતરો ઘટી જશે તે વાત સાચી નથી. સેન્ટર્સ ઓફ ડિસીસ કંટ્રોલ એન્ડ પ્રિવેન્શને (CDC)કેટલીક પરિસ્થિતઓને છોડીને આવી કોઈ ભલામણ કરી નથી, જેમ કે સર્ફેશની સફાઈ કરવી અને વાયરસથી સંક્રમિત કોઈ વ્યક્તિના કપડા ધોતી વખતે. આ સ્થિતિઓમાં પણ જો તેને યોગ્ય રીતે હાથમાંથી કાઢવામાં આવે તો જ તે અસરકારક બની શકે છે. પરંતુ જ્યારે કરિયાણું ખરીદવાની વાત આવે ત્યારે ગ્લવ્સ અસરકારક સાબિત નથી.

ગ્લવ્સ કેમ અસરકારક નથી?

જ્યારે તમે ગ્લવ્સ પહેરો છો અને કોઈપણ ગંદી વસ્તુને સ્પર્શ કરો છો ત્યારે વાયરસ તમારા ગ્લવ્સમાં ચોંટી જાય છે અને તે તમારી આંગળીઓ સાથે ચોંટેલો રહે છે. વધુમાં જ્યારે તમે તે જ ગ્લવ્સવાળા હાથથી મોં કે ચહેરાને અડો છો ત્યારે તમને સીધું સંક્રમણ લાગવાનો ખતરો રહે છે. તેથી ગ્લવ્સ કોઈ પણ રીતે સુરક્ષિત નથી.

ગ્લવ્સમાં સૌથી અઘરું કામ હોય છે તે તેને હાથમાંથી કાઢવાનું. જો તમે સાવચેત નહીં રહો તો કિટાણું તમારા હાથ અને શરીરના અન્ય ભાગમાં ટ્રાન્સફર થાય છે. જ્યારે તમે ગ્લવ્સ કાઢો ત્યારે તેનો યોગ્ય રીતે નિકાલ કરો અને બાદમાં સાબુ અને પાણીથી 20 સેકન્ડ માટે હાથ ધોવો.

ગ્લવ્સ તમને વાયરસના સીધા સંપર્કમાંથી આવતા બચાવતા નથી. ગ્લવ્સ પહેર્યા વગર કામ કરો ત્યારે ઈન્ફેક્શનનો જેટલો ખતરો હોય છે એટલો જ ખતરો ગ્લવ્સ પહેરીને કામ કરો ત્યારે રહેલો છે.

આ સ્થિતિમાં શું કરવું જોઈએ?

સંક્રમિત વ્યક્તિ વાતો કરે ત્યારે અથવા તમારી આસપાસ છીંક ખાય ત્યારે તેના થકી વાયરસ ટ્રાન્સફર થવાનો ખતરો રહેલો છે. કરિયાણાના સ્ટોર્સમાં ફૂડ પ્રોડક્ટને અડવાથી ઈન્ફેક્શન નથી થતું. માત્ર સોશિયલ ડિસ્ટન્સિંગનું પાલન કરો. તમારું શોપિંગ લિસ્ટ તૈયાર રાખો કે જેથી ફટાફટ શોપિંગ કરી શકાય. તમારી સુરક્ષા માટે, તમારા હાથ સેનિટાઈઝરથી સાફ કરો અને શોપિંગ કાર્ટના હેન્ડલને પણ સેનિટાઈઝ કરો. જે વસ્તુ તમે નથી લેવા માગતા તેને અડશો નહીં. ઘરે પરત આવ્યા બાદ પણ 20 સેકન્ડ સુધી તમારા હાથ ધોવો અને મોબાઈલને સેનિટાઈઝ કરો.

source https://www.iamgujarat.com/health-news/coronavirus-why-you-should-avoid-wearing-gloves-while-grocery-shopping-558313/