કોરોના વાયરસઃ ઘર બહાર જઈ રહ્યા છો? આ 5 ભૂલોના કારણે જોખમમાં મૂકાઈ શકે છે હેલ્થ

ઘર બહાર જઈ રહ્યા છો?

ભારતમાં ખૂબ જ ઝડપથી કોરોના વાયરસના કેસ વધી રહ્યા છે. આ દરમિયાન સરકારે લોકડાઉનમાં પણ છૂટછાટ આપી છે. દિવસેને દિવસે વધુમાં વધુ લોકો બહાર નીકળી રહ્યા છે. કોઈ ઓફિસે જઈ રહ્યું છે, તો કોઈ શોપિંગ કરવા. પરંતુ આ એવો સમય છે જ્યાં જરૂર ન હોય તો ઘર બહાર ન નીકળવું જ ઉચિત છે. તેમ છતાં જો ઘર બહાર નીકળવું જ પડે તેમ હોય તો કેટલીક એવી ભૂલો છે જે ન કરવી. કારણ કે આવી ભૂલોના કારણે સંક્રમણનો ખતરો વધી જાય છે.

માસ્ક, હેન્ડ સેનિટાઈઝર અને ટિશ્યૂ વગર બહાર નીકળવું

તમે ભલે સોસાયટીના ગેટ સુધી જ જઈ રહ્યા હો કે પછી કામ પર. ઘર બહાર નીકળો એટલે માસ્ક પહેરવાનું ભૂલશો નહીં. બહાર કોણ વાયરસથી સંક્રમિત થઈને ફરી રહ્યું છે તે વાત તમે પણ જાણતા હોતા નથી. CDCનું કહેવું છે કે, ઘર બહાર નીકળો ત્યારે માસ્કની સાથે સેનિટાઈઝર અને ટિશ્યૂ પેપર પણ સાથે રાખવું.

વાયરસ હજુ ગયો નથી

તે સમજવું ખૂબ જ જરૂરી છે કે, ભલે લોકડાઉનમાં છૂટછાટ મળી પરંતુ વાયરસ હજુ ગયો નથી. નરી આંખે પણ જોઈ ન શકાય તેવો જીવલેણ કોવિડ-19 હજુ પણ આપણી વચ્ચે છે. તેથી ઘર બહાર નીકળો ત્યારે સાવચેતી રાખો અને સોશિયલ ડિસ્ટન્સિંગનું પાલન કરો.

શોપિંગ માટે જવાના છો?

મહામારીના કારણે વિશ્વના તમામ દેશોની અર્થવ્યવસ્થા ખોરવાઈ ગઈ છે, જેમાંથી ભારત પણ બાકાત નથી. તમારી વિશ લિસ્ટમાં હોય તેની ખરીદી કરવા માટે કેટલી ઉત્સુકતા હોય તે વાતને સમજી શકાય છે. પરંતુ આ સમય દરમિયાન નાણાકીય રીતે સિક્યોર રહેવું વધારે જરૂરી છે. તેથી શોપિંગ બને એટલું ઓછું અને જરૂરી ન હોય તો બિલકુલ ન કરવું. આ સમયમાં ખર્ચા ઓછા હશે તો વધારે સારું રહેશે.

બહારની કોઈ વસ્તુને અડવી

લોકો ફરીથી સામાન્ય જીવન જીવવાનો પ્રયાસ કરી રહ્યા છે. પરંતુ અત્યારે આપણે કઈ વસ્તુને અડકી રહ્યા છીએ અને કઈ વસ્તુના સંપર્કમાં આવી રહ્યા છીએ તે બાબતની સાવચેતી રાખવાની છે. વધુને વધુ લોકો પોતાની જોબ પર જવા લાગ્યા છે, ત્યારે જે જગ્યાએ અડાઅડ વધારે થતી હોય ત્યાંથી દૂર રહેવું

કોરોનાના ન્યૂઝ વાંચવાનું બંધ કરી દેવું

કોરોના વાયરસના પોઝિટિવ કેસની સંખ્યા અને મૃત્યુદર વિશે જાણીને તકલીફ થાય છે, તે વાત સમજી શકાય છે. પરંતુ લોકડાઉનના નીતિ-નિયમોની ગાઈડલાઈન્સ અને તમારા શહેરમાં કયા વિસ્તારો હોટસ્પોટ બન્યા છે તે અંગે અપડેટ રહેવું જરૂરી છે.

source https://www.iamgujarat.com/health-news/coronavirus-these-5-big-mistakes-can-put-your-health-at-risk-568203/