માસ્ક પહેરવાથી વધી રહી છે સ્કિનને લગતી સમસ્યા, આ ઉપાયથી મેળવો છુટકારો

‘માસ્કથી થઈ રહી છે સ્કિનને લગતી સમસ્યા’

ડો.શૈલી પટેલ

કોરોના વાયરસ મહામારીના કારણે માસ્ક પહેરવું ફરજિયાત થઈ ગયું છે પરંતુ સતત માસ્ક પહેરવાથી તે સ્કિનને લગતી સમસ્યાઓને આમંત્રણ પણ નોતરે છે. શહેરના ડર્મટલૉજિસ્ટ ડો. શૈલી પટેલનું કહેવું છે કે, માસ્કના સતત ઉપયોગથી ખીલ, ફંગલ ઈન્ફેક્શન અને ખરજવાના કેસ વધી ગયા છે. તેથી હાલના સમયમાં વન ટાઈમ યુઝ અથવા મેડિકલ ગ્રેડ માસ્ક પહેરવું જ ઉચિત રહેશે. જો રિયુઝેબલ માસ્ક સરખી રીતે ધોવાયું ન હોય તો તેનાથી સ્કિનને લગતી તકલીફો થાય છે. માસ્કને વધારે પડતું ન ધોવો અને એકદમ ટાઈટ હોય તેવું ન પહેરો. કોટન માસ્કમાં સરળતાથી શ્વાસ લઈ શકાય છે, જ્યારે ડિઝાઈનર માસ્ક સ્કિન પર ઉઝરડા પાડી દે છે. જ્યારે આપણે માસ્ક પહેરીએ છીએ ત્યારે તે જ હવામાં શ્વાસ લઈએ છીએ અને બહાર કાઢીએ છીએ. મોઈશ્ચર અંદર રહે છે, ખાસ કરીને જ્યારે તમે હવાઉજાસવાળા વિસ્તારમાં ન હો ત્યારે. તે ફૂગ અને બેક્ટેરિયા માટેના બ્રીડિંગનું કેન્દ્ર બને છે. જેનાથી પોર્સ ભરાય જાય છે અને ખીલ થાય છે. મેકઅપ સ્થિતિને વધારે ખરાબ કરે છે. તેથી માઈલ્ડ ક્લીન્ઝરથી દિવસમાં બેથી ત્રણ વખત તમારો ચહેરો વોશ કરો. જો જરૂર લાગે તો થોડું મોઈશ્ચરાઈઝર લગાવો અને જો તમે સનસ્ક્રીન વાપરતાં હો તો એ પણ લગાવી શકો છો. સ્કિન પર વધારે કંઈ લગાવશો નહીં. હોઠ પર થોડું મોઈશ્ચર લગાવી શકો છો. જો તમે નોકરી કરતા હો અને તમારી સ્કિન ઓઈલી હોય તેમજ ખૂબ જ પરસેવો થતો હોય તો દર 3-4 કલાકે તમારો ચહેરો ધોવો, મોઈશ્ચરાઈઝર લગાવો અને માસ્ક બદલી નાખો. આ તણાવપૂર્ણ સમય ખીલનું મુખ્ય કારણ છે. પરંતુ આ કારણથી માસ્ક પહેરવાનું પણ ન ટાળવું જોઈએ.

હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો:

‘માસ્ક પહેરતા પહેલા મોઈશ્ચરાઈઝર લગાવો’

સુરભી મંગનાની

તો મેકઅપ આર્ટિસ્ટ સુરભી મંગનાનીનું કહેવું છે કે, ‘જો ખૂબ જ જરૂરી ન હોય તો હું માસ્ક પહેરવાનું ટાળુ છું. અને જ્યારે પહેરું ત્યારે ઘરે બનાવેલા માસ્કને પ્રાથમિકતા આપું છું. કારણે તે સોફ્ટ હોય છે અને ચામડીમાં ખૂંચતું નથી. જ્યારે હું માસ્ક પહેરું તેના પહેલા મોઈશ્ચરાઈઝર લગાવી દઉ છું. માસ્ક પહેર્યું હોવા છતાં માટીના રજકણો સ્કિન પર ચોંટી જાય છે અને જ્યારે તેની સાથે ભેજ સાથે ભળે છે ત્યારે ફોલ્લી અને ખીલ થાય છે. મોઈશ્ચરાઈઝર સુરક્ષા આપવાનું કામ કરે છે. જો તમારી સ્કિન ઓઈલી હોય તો વોટર-બેઝ્ડ મોઈશ્ચરાઈઝરનો ઉપયોગ કરો. ટોનિંગ પણ કરવું જોઈએ. હું સ્ક્રબ વાપરું છું અને અઠવાડિયામાં એકવાર ફેસપેક લગાવું છું. આ રુટિન તમારી સ્કિનને હાઈડ્રેટેડ રાખે છે. હોઠ માટે હું લિપ બામ લગાવવાની સલાહ આપીશ’.

‘સ્કિનને ક્લીન રાખવી જરૂરી છે’

ખયાલી વાધવા

બિઝનેસ એનાલિસ્ટ ખયાલી વાધવાએ કહ્યું કે, ‘કોટનમાંથી બનેલું માસ્ક પહેરવું માત્ર મહત્વનું નથી, પરંતુ ખીલ ન થાય તે માટે તમારી સ્કિનને ક્લીન રાખવી તે પણ અગત્યનું છે. તેથી હું માસ્ક પહેરતા પહેલા ક્લીન્ઝર વાપરું છું અને ત્યારબાદ ટોનર અને પછી મોઈશ્ચરાઈઝર. રાત્રે ઊંઘતી વખતે પણ આ 3 વસ્તુ લગાવીને ઊંઘુ છું. હું અઠવાડિયામાં એકવાર કાચું દૂધ અને ટામેટાના પલ્પમાંથી બનાવેલી પેસ્ટ લગાવું છું. તે સ્કિનને નેચરલ ગ્લો આપે છે. હોઠ મોઈશ્ચરાઈઝિંગ કરવા પણ જરૂરી છે અને માસ્ક પહેરતા પહેલા લિપ બામ પણ લગાવો. લીંબુનો રસ અને ખાંડને મિક્સ કરીને હોઠ પર સ્ક્રબ કરવાથી ડેડ સેલ્સ નીકળી જશે’.

source https://www.iamgujarat.com/health-news/cases-of-acne-have-gone-up-due-to-usage-of-masks-here-is-how-to-get-rid-of-576133/