કોરોના મહામારી વચ્ચે તમારું બાળક હેલ્ધી રહે તે માટે આ બાબતોનું રાખો ધ્યાન

ઘરની ચાર દિવાલોમાં બંધ છે બાળકો

ખતરનાક અને જીવલેણ કોરોના વાયરસે દુનિયાના મોટાભાગના દેશોમાં હાહાકાર મચાવી દીધો છે. વૈશ્વિક સ્તરે તેનાથી 5 લાખ કરતાં વધુ લોકો મૃત્યુ પામ્યા છે. આ સિવાય દિવસેને દિવસે તેના કેસો વધી રહ્યા છે તો બીજી તરફ લોકડાઉનમાં પણ છૂટછાટ આપવામાં આવી રહી છે. નોકરી કરતાં લોકો ધીમે-ધીમે ઘર બહાર નીકળીને ઓફિસે જવા લાગ્યા છે, તો સ્કૂલો તેમજ એજ્યુકેશન ઈન્સ્ટિટ્યૂટ બંધ હોવાથી બાળકો ઘરે છે.

બાળક હાલ બહાર રમવા ન જઈ રહ્યું હોવાથી અને ઘરની ચાર દિવાલોમાં જ બંધ રહેવાથી તેમની સારી રીતે સંભાળ રાખવી તે પણ માતા-પિતા માટે એક ચેલેન્જિંગ ટાસ્ક છે. આ દરમિયાન તે માનસિક અને શારીરિક રીતે હેલ્ધી રહે તે પણ જરૂરી છે.

મહામારીમાં આ રીતે રાખો બાળકનું ધ્યાન

સ્કૂલો ક્યારથી શરૂ થશે તે વિશે તમને પણ જાણ નથી ત્યારે માતા-પિતા તરીકે તમારું બાળક 3 ટાઈમ બરાબર જમે અને પૂરતી ઊંઘ લે તે જોવાની જવાબદારી તમારી છે. અમે તમને પાંચ ટિપ્સ આપી રહ્યા છીએ, જેનાથી તમે તમારું બાળક સ્વસ્છ છે તેની ખાતરી કરી શકશો.

જંક ફૂડ અને પેકેટ ફૂડને કહો ‘ના’

બાળક સ્કૂલે જતું હોય તેથી તેને ટિફિનમાં આપવા માટે તને ઈન્સ્ટન્ટ નૂડલ્સ, કૂકીઝ, બિસ્કીટ અને રેડી-ટુ-ઈન પ્રોડક્ટનો ખડકલો ફ્રિજમાં અને ડબ્બામાં કરી દીધો હોય તે સમજી શકાય છે. પરંતુ હાલના સમયમાં તમારા બાળકના પેટમાં શું જઈ રહ્યું છે, તેનું ધ્યાન રાખવું વધારે જરૂરી છે. તેથી તમારા ઘરમાં જંક ફૂડ કે પેકેટ ફૂડ હોય તો હાલ જ તેને કાઢી નાખો અને તેના બદલે ફ્રૂટ લઈ આવો.

ગેજેટ્સ અને સ્ક્રીન ટાઈમ માટે સમય નક્કી કરો

બહાર જઈ ન શકતા હોવાથી અને હાલ સ્કૂલો પણ બંધ હોવાથી બાળકો ગેજેટ્સનો વધારે પડતો ઉપયોગ કરી રહ્યા છે. તેથી તમે તેના ગેજેટ્સ અને સ્ક્રીન ટાઈમ માટે સમય નક્કી કરો.

પૂરતી ઊંઘ

નાના બાળકોના શારીરિક અને માનસિક સ્વાસ્થ્ય માટે તે રાત્રે પૂરતી ઊંઘ લે તે જરૂરી છે. તેથી જ તે સમયસર ઊંઘી જાય અને બેડમાં ગેજેટ્સનો ઉપયોગ ન કરે તે જરૂરી છે.

યોગાસન

બાળકો બહાર રમવા ન જઈ રહ્યા હોવાથી અને આઉટડોર ગેમ્સ ન રમી રહ્યા હોવાથી તેઓ શારીરિક રીતે ફિટ રહે તે જોવાની જવાબદારી માતા-પિતાની છે. ઓછામાં ઓછી 30થી 40 મિનિટ સુધી તેમની પાસે ફિઝિકલ એક્ટિવિટી કરાવો. તમે તેની સાથે બેસીને યોગાસન પણ કરી શકો છો.

પર્સનલ હાઈજીન

કોરોના હજુ ગયો નથી તે વાતને ધ્યાનમાં રાખીને તમારા બાળકને પર્સનલ હાઈજીન અંગે જણાવો. તેમને શીખવો કે વાયરસ સામે લડવા માટે 30 સેકન્ડ સુધી વ્યવસ્થિત રીતે હાથ ધોવા જરૂરી છે. આ સિવાય છીંક ખાતી વખતે કે ઉધરસ ખાતી વખતે મોં આગળ રૂમાલ રાખવો જરૂરી છે. તેમજ તેને માસ્ક વિશે પણ સમજાવો.

source https://www.iamgujarat.com/health-news/how-to-ensure-that-your-child-has-a-healthy-lifestyle-during-coronavirus-571495/